„I war scho überall, außer in ana Kuawampn“
(Wasserskibootfahrer in Tulln über sei Lebn)

„Neues Leiwandes findst nimma. In jedem Loch warst a scho drin“.
(A Hawara ausn Gym über sei Midflifekreisis)

„Das Typische an mir ist, i bin untypisch ganz und goar amoi hoch und amoi tiaf, amoi gspritzt dann wieda kloar.“
(Falco über si söba im Song America)

Was gibt’s über mi zum sagn: Von Geburt her hab i’s eh guat troffn, Akademikerfamilie leida oba a mit brauner Vergangenheit (na wer net?). I hab Beides ghabt, vü Freiheit und vü Watschn. War a andere Zeit sagt ma. Wos i damit sogn wü, mit Schuld und Scham kenn i mi dafür guat aus. 

Glernt hab i imma scho gern, oba viel anstrengen hab i mi miassn. Heut tatns mi mitn Ritalin zrechtbiagn. Nach der Schul bin i auf die Uni. Gheat si aso für’s bessere Gerstl und den schönern Anschein. Wobei eigentlich bin i a viel in die Lehr gangen bei die Brandinesa und gewissen Gewerbelokaln der näheren Umgebung. A viel Techno Festln inklusive zugehörigen Gift, was hoit gebn hat – polytox tät ma heut sagn. Nebenbei hackln für die Marie als Consulter bei ana von die 4 Großen, wer’s kennt. A Zeit lang is des so grennt, bis der Spaß weg war und der Alk und das Gift no da. Fast nimma dabremst, mit 27 in Therapie und seit dem sauber.

Dann hab i anzaht auf da Uni und dann auf da Karierrelata. I bin ume auf Kanada zu HSBC Bank, schöns Land mit viel Platz. 3 Jahre Vancouver, 2 Jahre Montreal – I can English und parlez vous. An patzn Postgraduate hab i a no gmacht – CFA falls Ihnen des was sagt. Mei Bruder hat derweil gheirat und i wollt mir a Oide einredn, auf die i eigentlich net gstandn bin. Grad no rechtzeitig ogseilt und zruck nach Wien, Wien nur du allein. 

Eigentlich wollt ich Unternehmer sein, hab mi aber net traut. So bin i zur Nationalbank, mehr Sicherheit und Stabilität geht net. Mei Frau hab i dort kennen glernt. Wie die bei mein Jobinterview einekommen is, hab i ma scho dacht: jö schee, da geht die Sunn auf, jetzt kann ma nix mehr passieren. Wie ma dann zamkumma san, hamma des Pantscherl a Jahr geheim ghalten – a schöne Zeit! 

Und nach zwa Jahr war der erste Gschrapp do. Scheiß mich an, war des ein Erlebnis. Rausgeschlüpft wie a klane weiße Robbe und innerhalb von Sekunden des schönste Rosa des die Welt je  gsehn hat. Wir san dann beruflich in die Schweiz, mi hat des in dera Bank nimma zaht. Wir san für Finanzmakrtstabilität zuständig gwesn und ollas is ausanand gflogn. Muaßt di scho fragn, wozu mach i de Hackn?

Schweiz war leiwand! I hab für so an milliardenschwern Österreicher ghacklt, a Unternehmer und Verrückter im positiven Sinn, voll interessanter Typ. Da hab i gsehn, was a Mensch allanich alles anschiebn kann. Zerst war i in seiner Fondsbude und dann war i als CEO für den Aufbau von ana Neurorehaklinik verantwortlich. Echt spannend. 

Daham is net so rund grennt, so ehrlich muaß ma sein. So viel neu und anders, vor allem a für mei Frau. Sie is a Burgenländerin, die miassn allerweil so viel hackln und können fast net anders – a riesn Umstellung für sie. I ziag heut no mein Huat und echt mega Respekt, dass sie des so hinkriegt hat und wir a als Team. Viel Beziehungsarbeit, viel streitn, redn, versöhnen, weitermachn. Aber untern Strich echt leiwand, wann Sie da drauf klickn sehen sie’s eh. Direkt am Vierwaldstättersee war ma da.

Schaut aus wie’s Paradies aber war’s es a net. Nach mittlerweile zwa Karenzn wollt mei Frau wieder zruck in Job und bei mir hat sich a unangenehma Proteschee einedrängt. Wir ham se wie der Joel Billy dacht „Vienna waits for you“ und san ham.

Es war ja eigentlich scho nach Canada, dass mir klar wordn is: des was i suach, des liegt net da draußn. Drin muaßt schaun. I bin eh scho in Therapie ganga zwecks Innenschau. Na da hat’s ausgschaut. Des alles entdecken, verstehen, gspürn is a Abenteur oder besser gsagt wie der Mandalorian, falls den kennen: „This is the way“. Oder wie der Ambros Woiferl gsunga hat: „Der Weg zu Dir selber hört nie auf, hinter dir geht’s abwärts und vor dir steil bergauf.“

Mi hat des immer scho so fasziniert, also hab i des auf der Uni angfangen zum studiern. Damit i mi da praktisch a auskenn, hab i als Sozialpädagoge garbeitet. Mia ham da psychisch auffällige Kinder und Jugendliche in Wohngmeinschaftn oder in Einzelbetreuung gahbt. Die Mehrheit von die Kinder hat die staatliche Fürsorg den Eltern ognomma, schwere Schicksale wie Sie sich’s kaum vostelln könna. Schwere Hackn hinsichtlich Psychohygenie, aber Du merkst Du machst an Unterschied.

In dera Zeit war i a und des bin ich immer no haupt- bzw. mehr zuständig für die Kinder daham, mittlerweile waren’s scho drei. Drei wundervolle Madln hamma – die größten und wertvollsten Geschenke, der Sternenstaub auf’s Lebn möcht i sagn. Anyway, den Punkt den i machn will, i kenn mittlerweile beide Rollen sehr guat, die (ehemalig) traditionell männliche und weibliche. Is a Vorteil, sag i amal, wenn’s ums Verstehn von unterschiedliche Lebensgschichtn geht.

Die Hackn mit die Jungendlichen is ca. 5 Jahr grennt. Die Nachtdienste, die Ausbildung, die eigene Family,… des war alles a bisserl viel. Im Gebälk, sprich vor allem in der Ehe hat’s angfangen zum Knirschen. Alles was der/die Andere sagt wird auf die Waagschale glegt, fast alles negativ interpretiert, mia ham se angschrien, leider a vor die Kinder – echte Krise. 

Zum Glück war immer a Kern da, der am Schönen von früher oder an ana schönen Fantasie von Zukunft festghaltn hat. So samma durch. Imago Therapie/Workshops, die ham uns echt vire ghaut, individuell und als Paar. Der Partner/die Partnerin is dei beste Lern-, Erkenntnis-, Wachstums- und Heilungsmöglichkeit für si selber und für die Beziehung. Falls bei Ihnen a amal knirscht, die Bösels kann ich Ihnen da wärmstens empfehln. Quasi: hast Du in der Beziehung Brösel geh zu Bösel.

Mit der Ausbildung bin i soweit fertig. Da ghörn neben viel lernen mittlerweile gut 400 Stunden Selbsterfahrung, sprich eigene Therapie dazua, damit i waß wo’s eigene Vogerl so umgeht. Und Erfahrung als Therapeut hab i auf der Psychiatrie im Donauspital gsammelt. Ja und als Sozialpädagoge hab i a an recht therapeutischn Zugang ghabt. Jetzt bin i in eigena Praxis tätig. Schaut echt schee aus die Praxis. Da werdn Sie si wohl fühln, glaub i,  geschützt und frei. “Psychotherapeut” nenn i mi nur deshalb net, weil an Köch mit mein Ausbüdungsverein vua Gericht hob.

Übrigens, verstehn Sie den Schmäh mit krzy1.com? Mein Nachnamen hat in Canada kana aussprechen könna. Statt [Kschywonje] habn die des als „Crazy One“ glesn. I hab ma dacht, schreibst es mit an Anser. Und des .com liest ma dann für „come“ wie kommen. Naja wirkt wahrscheinlich net so guat wann ma den Schmäh erklärn muaß. Anyway, i glaub a jede und a jeder is a bissl verruckt. Muaßt a sein in dera Welt, wo so viel net logisch is.

Des Wichtige, wos i Sie frogn wü, is, wie geht’s Ihna dabei, wann Sie des lesen? Weu, wos ma sicha waß is, dass a guate – also ehrliche, emphatische, konstruktive usw. – Beziehung zwischn Therapeut und Klient es Wichtigste is füa a erfolgreiche Therapie. Gspains eine und ausn Bauch heraus entscheidn tat i empföhn. Wann’s so is, meine Kontaktdaten san ganz untn am End vo dera Seitn, oda Sie klickn auf WO.